चौदण्डीगढीमा ट्याक्टर दुर्घटनामा परी एक जनाको मृत्यु

सप्तकोसी / उदयपुरको चौदण्डीगढी नगरपालिका –३ हात्तिसारमा बुधबार  ट्याक्टर दुर्घटनामा परी एक जनाको  मृत्यु भएको छ।

इटहरीबाट निर्माण सामाग्री लिएर उदयपुरको बेलका नगरपालिका–२ भागलपुर तर्फ जाँदै गरेको को २ त ६३४९ नम्बरको ट्याक्टर उदयपुरको चौदण्डीगढी नगरपालिका–३ हात्तिसारमा दुर्घटना हुँदा चालक तिलक राईको घटना स्थलमै मृत्यु भएको हो।

दुर्घटनामा परी सो ट्याक्टरमा सवार दुई जना घाईते भएको जिल्ला प्रहरी कार्यालय उदयपुरले जनाएको छ।

घाइते दुई जनालाई उपचारका लागि चौदण्डीगढी नगर अस्पतालमा भर्ना गरिएको छ।

ट्याक्टर दुर्घटनाको कारण खुल्न नसकेको प्रहरीले जनाएको छ। ट्याक्टरमा फलामको ट्युब लोड गरिएको र सडक ओरालो भएकोले ट्याक्टर अनियन्त्रित भएर दुर्घटना भएको हुन सक्ने स्थानीयले बताएका छन्।