सौर्य हेल्थ केयर धरानले सडक मानवलाई उपचार गर्ने

बागीन्युज संवाददाता

धरान, चैत्र २६ । सौर्य हेल्थ केयर फाउन्डेशन प्रा.ली. धरानले घरबार विहिन सडक मानवलाई नियमित प्राथमिक उपचार तथा स्वास्थ्य परिक्षण निशुल्क रुपमा गर्ने भएको छ ।

शनिबार फाउन्डेशनको कार्यालयमा आयोजित एक कार्यक्रममा दिइएको जानकारी अनुसार स्वास्थ्य सेवालाई समाजका सबै वर्गको पहुँचमा पु¥याउने फाउन्डेशनको योजना अन्तर्गत यो सेवा दिइने भएको हो । फाउन्डेशनका अध्यक्ष डा. प्रमोद अग्रवालका अनुसार प्रा.ली.ले यसका लागि ‘प्रोजेक्ट लाइफ’ कार्यक्रम सञ्चालन गर्नेछ । यस अन्तर्गत प्रा.ली.ले कुनैपनि निजी वा सरकारी संस्थाका सदस्य तथा कर्मचारीहरुलाई समेत निशुल्क स्वास्थ्य सेवा दिनेछ । यसका लागि प्रा.ली.सँग समन्वय गर्नुपर्नेछ । यस अन्तर्गत नै प्रा.ली.ले स्वास्थ्य उपचार सम्बन्धि परामर्श लिन चाहने व्यक्ति वा संस्थालाई विभिन्न माध्यमबाट स्वास्थ्य परामर्श दिनेछ ।

फाउन्डेशनको यही कार्यक्रम अन्तर्गत शनिबार सुनसरीलाई कार्यक्षेत्र बनाएर पत्रकारिता गर्दै गरेका पत्रकारहरूका लागि निःशुल्क स्वास्थ्य परीक्षण तथा भिटामिन डी खोप कार्यक्रम सम्पन्न भएको छ । नेपाल पत्रकार महासँघ सुनसरीको संयोजनमा प्रा.ली.ले आफ्नो कार्यालयमै सो कार्यक्रम सम्पन्न गरेको हो । यस अन्तर्गत ३१ जना पत्रकारले ल्याब परीक्षण, ४५ जनाले भिटामिन डी खोप र ४५ जनाले इसिजी सेवा निःशुल्क लिएका थिए ।

प्रा.ली.मा उपलब्ध स्वास्थ्य उपचार सेवाका लागि सञ्चारकर्मीहरुसँग सदैव सहकार्य गर्न तत्पर रहेको फाउन्डेशनका अध्यक्ष डा.अग्रवालले बताउनुभयो । प्रा.ली.का प्रबन्ध निर्देशक डा. मोनिका अग्रवाल, प्रबन्धक लुइस जेम्स राई लगायतले कम्पनीले दिदैं आएका सेवाहरूबारे स्पष्ट पार्नुभएको थियो ।

‘जिन्दगीलाई समर्पित, जिन्दगीका लागि’ भन्ने मुल मन्त्रका साथ २०७० साल साउन २७ गते देखि सञ्चालनमा आएको सौर्य हेल्थ केयर फाउन्डेसन आधुनिक प्रविधि सहितको सुविधा सम्पन्न स्वास्थ्य सेवा प्रदायक कम्पनी हो । यहाँ दाँत सम्बन्धी सबै उपचार, हाडजोर्नी, नसा, फिजियोथेरापी, सुरक्षित गर्भपतन, कान नसुन्नेहरूको परीक्षण सेवा सञ्चालनमा छ । ल्याब सेवामा भिटामिन डी, होलबडी जाँच, थाइराइड, भिडियो एक्स–रे, डिजिटल एक्स–रे, कोलेस्ट्रोल, कलेजो र मिर्गौला जाँच, मुटु रोगको इसिजि परीक्षण लगायतमा न्यूनतम शुल्क कायम गरिएको अध्यक्ष डा.अग्रवालले जानकारी दिनुभएको छ ।

तस्विरहरु सौर्य हेल्थ केयर फाउन्डेशनको फेसबुकबाट
……………..