सप्तकोशी, ५ पुस । सप्तरीको रुपनीमा टिपरको ठक्करबाट विद्यालय गइरहेकी १२ वर्षीया बालिकाको मृत्यु भएको छ।
मंगलबार बिहान पूर्व–पश्चिम राजमार्गअन्तर्गत रुपनी गाउँपालिका– १ मा ना १ क ८५४२ नम्बरको टिपरले सोही स्थानका शंकर यादवकी १२ वर्षीया छोरी रिताकुमारी यादवलाई ठक्कर दिएको थियो।
ठक्करबाट विद्यालय गइरहेकी बालिकाको घटनास्थलमै मृत्यु भएको हो । साईकल चढेर विद्यालय जाँदै गरेकी बालिकालाई ठक्कर दिएर पुनः पछाडि सारेर टिपर चालकले किचेर हत्या गरेको स्थानीयको आरोप छ ।

घटना लगतै स्थानीयबासी र विद्यार्थीहरुले सडकमा टायर बालेर प्रदर्शन गरेपछि स्थिति तनावपूर्ण बनेको थियो । आक्रोशित आफन्त र स्थानीयले राजमार्ग अवरुद्ध गरी प्रदर्शन गरेका छन्। चक्काजाम सहित प्रदर्शन बढेपछि प्रदर्शनकारीलाई नियन्त्रणमा लिन प्रहरीले ८ राउण्ड अश्रुग्यास र १० राउण्ड हवाई फायर गरेको थियो।

Facebook Comments Box